Reading time is around minutes.
الري يقولو عليه مات
أما آنا نقوللكم هيهات
كل ما فما إنو غاب
ونساتو الأحباب
والمجيرة قاتلتها الغيرة
كيفاش التو ما ولات مديرة
والكوال يستنى في تغيير الأحوال
ضارب خماسو في سداسو
ومجيش بنادريتو وناسو
معمل على شدان الكرسي
في رجب ولا شوال
والسبعة الحية
تستنى فيك وفي
باش نحللولها الثنية
والي يستنى خير من الي يتمنى
ومحلاها الجنة كيف تتدنى
واللص يظهرلي تحمص
على خاطر التسعة والعشرة
نساو الخبز والملح ونساو العشرة
هربو بالملمة والي فما
وما خلاولو كان المضربة والقلص
قعد بحذا الثنين والثلاثة
يتفلسفولو في الأصالة والحداثة
والكب والقلب والترافل
الي جاييهم غافل
والهارب منهم جافل
أما آنا طبت وفديت
من الكارطة المهبولة مليت
من وقت طروادة والأندلس
من شياح النوار وعام الجراد
من وقت كساحت قلوب العباد
أما لازم يجي نهار
ويرجع الري المغوار
وترجع البهجة لكل دار
وتمشي الكارطة مع الحي
وترجع الوهرة لدار الباي
Comments powered by CComment